Hai que lo lleer too, dizlo mio pa y tien mas razon qu'un santu. Nun solo hai que lleer sinon que tamien hai qu'escuchar. Gracies a la llectura de los blogues d'otros collacio pues llegar a sitios como esti, y si llego a poneme a escuchar al mio pa igual llego enantes (mira que creer que nun lu conocia!!).
Los planes pal domingu pasau pasaben por otres idegues, pero mira tu que salio un dia soleyeru como quiriendo despedise del branu y camudaron les nueses intenciones pa dalgun sitiu que tuviera terracina pa tar xintando al aire llibre que n'Asturies nun tamos sobraos de dies prestosos. pela tiesta pasaron un par de sitios (casa Josefina, Les Viñes...) pero nun cuayaron hasta que prendiose la bombilluca y cayimos en Lada.
Dir a Lada a xintar fuera pue paecer raro, pero les semeyes del blogue de "Asturies de Mar, Monti y Fogones" terminaron de convencenos. Gran idea la de venir hasta equi.
Al fondu de Lada, la casa ta situa de forma estratexica (ensin querer, digo yo) pa que dende'l prau y la terraza nun veas la "parte guapa" de llangreu (termica, quimica and company).
El dia acompañaba, el sitiu tamien, los pitos taben a lo suyo y'l burru taba pastiando tranquilamente. L'otru burru (o sea yo) ya taba naguando por entamar la comida.
D'entamu pa compartir nos decidimos por una ensaladina templada de pulpu (semeya siguienti). Rica y fresca que yera pa lo que taba'l dia. El pulpu cola testura perfeuta, vinagretina perriba, unes fueyes de llechuga y unes pataquines cocies. Curioso los de les cebolletes en vinagre. Dieron-yos como un toque de sarten pa pochales y dexaronles un plizcu acaremilazaes y d'esi color marronin que se ve na semeya. Curiosu amestu el que dexo esi toque cola vinagre que traen. Curiosu y prestosu.
Pero, sin dulda, lo interesante del sitiu son los fogones de verda y, como'l pitu caleya ye por encargu y nun taba preparau pa da-yos caña a los que saltaben pel gallineru, pidimos una de rau de toru y una de cabritin con pataquinos. Buff,buff, que fartura y que placer de cocina. El mio cabritin taba pa rellambese, tienru, bien guisao, sele de tastu, con una salsina de pimientinos que facia saltar les llarimes al tou buen comensal que se precie. En resumen....que bono!!. Agora, si'l cabritu taba impresionante, el rau de toru foi un espectaculo pa los sentios. Acompañau de unos pataquinos, el tipicu guisu de paisana de tola vida con un plizcu cebolla y unos bonos trozos de rau (de toru, de güe, de vaca, de xatu o lo que fuere) yeren pa sacar al llombu a la cocinera pela puerta grande.
A tou esto pa pasar la comida tuvimos con un Aalto de 2006 que me resulto mas potente que'l del 2005 que prebara un par de mesinos pa tras. Quiciabes tien que ver que como sigan asina en España coles graduaciones de los vinos (14,5%) dientro de poco va dar lo mesmo xintar con vino que con una botellina de Macallan (ye un dicir) o eso o pidimos el vinu por chupitos. De toes formes, vinu potente n'un principiu que ameyoro col pasu del timepu al dir abriendo poco a poco. Llixera maera y ya nun se mas, el que quiera que merque "la guia Peñin" que yo solo se que taba bono y nos presto asgaya.
Tres cafetinos de pota con xelu (repeti, apeteciame), un chupitin d'oruxo con herbes y 37,5€/persona. Teniendo'n cuenta quel vinin yera casi la meta de la xinta "I'll be back" como diria Terminator porque paeciome una gran RCP. Sitiu realmente interesante que merez una visitina.
