Asador de La Miranda (La Miranda - Llanera)

Ya que nun toca nin un duru, pa dalgo deben valir les peñes quinielistiques,¿o non?. Pues valen pa esto, pa tar tou'l añu metiendo cuatro duros en premios y pagando un pucuñin mas toles selmanes y facer un xintaona al finar l'añu. Esti añu toconos un que, mira que lu tengo cerca d'onde creci y vivi, pero al que nunca fui xintar lo que toca equi (llechazu y gochin). Pues esti añu si, la fartura de la peña foi nel Asador de La Miranda. Los entamos fueron unes tables d'embutidos que nun taben mal, poco a poner enriba la mesa porque a lo que dibemos yera a los principales....tres gochinos a la segoviana pa 9-10, porque los 2-3 restantes prefirieron el llechal. los gochinos vinieron cola compaña de unes ensalades cencielles, unos pimientinos asaos y les pataquines al fornu correspondientes. ¿Que quereis que vos diga?, munchu casu a la compaña nun fiximos.

Porque teniemos gochu pa fartanos.

Bona pinta y bon gochu, quiciabes un plizcu salau, pero bona materia prima, pasau lo xusto pel fornu pa que'l pelleyu tuviere cruxente y la carne fecha nel so puntu. Los mas fartones dieron tolo que pudieron y mas y entovia sobronos como la meta d'un, que llevemos en tapers pa casa. Vamos, que foi una fartura importante. Creo que los corderinos tamien taben perbonos, eso si, nun tuve butiellu pa poneme a prebalos. Pela mesa pasaron unes cuantes botelles de La Montesa Cr 2009 que cumplio perfeutamente col cometiu de: "tar bono pa pasar la carne". Fuera coñes, ta prestosu esti vinin. Esta vegada nun pueo davos datos de les perres, de xuru que la nuesa tesorera me los daba, pero paso. Yo solo se que nos sobraron mas de 50€, asina que pal bote pal añu que vien. En resumen, un sitiu mas que valoratible pa dir xintar como en Castiella ensin tener que pasar el Negron (o'l Payares porque al preciu que se ta poniendo too, entovia vamos tener que volver xubir les cuestes del nuestru puertin)

Ambrosia e Nectar (Olhos d'Agua - Algarve -Portugal)

Esta foto de Ambrosia & Nectar es cortesía de TripAdvisor">

Olhos d'Agua ye un pueblin pesqueru de la zona del Algarve onde tuvieron los mio pas hospedaos. Lo curioso ye que nosotros tebemos como 30Km pal oeste asina que'n la selmana que coincidimos pela zona fuimos velos un par de vegaes. El pueblu ye abondo mas turisticu que'l nuesu (Ferragudo) pero nun nos paecio masificau y mantienen una componenete pesquera importante. De los chigres creo qu'hai que destacar dos, el caru de coy.., que ta na playa y l'ambrosia y nectar que ta na cai que baxa pa ella. Del primeru nun teo na que dicir, nun tuve, tuvieron los mio pas y comentaron que de calida asemeyao, pero claro, que les vistes na que ver. Asina que vamos centranos nel que tuvimos les dos vegaes. L'Ambrosia ye un chigre cuidadin, magar que los cartelos de neon son de los 70 polo menos. Tienen un terracina protexida del vientu de maera y cristal perafayaiza con un techu movil que dependiendo de como sople zarren o dexen abiertu. Pa dientro tien sitiu asgaya, ye abondo grande, pero lo nueso yera la terraza coles sos meses corrides de maera. Chigre de cocina cenciella colos tipicos pexes de la zona fresquinos y preparaos a la brasa. Robalos (furagañes) y douradas (dorades) xabaces de tamañu tirando a mediu que valien pa dos raciones. Brasa, un plizcu aceite y a esfrutalos. El primer dia pidimos bacallau al llagareru pa los neños, pero punxeronse les botes a furagaña, asina que'l segundu nun cometimos el mesmu error. De los entamos portuguesos tipicos destacar el pate de sardines, perbonu. La carta de vinos, curtia, pero con delles entrades riques, d'albariños Casal Garcia cumplio el primer dia y'l segundu fuimos a un Duas Quintas de Douro que taba bien bonu. Vamos falar de la cuenta "cara", la del tintu, que yeren 2 furagañaes pa 4 y una pa dos piquiñina, los entamos, un rua das quintas, chupitos y una cafetin, todo bien bono que salio a 30€ por cabeza si solo ties en cuenta a los 4 adultos, pero que onde xintaben bien 5, asina que falamos de 24€/persona reales. Tou esto, n'un sitiu turisticu, cada dia me presta mas viaxar al pias vecin.

Feria de San Mateo (Viseu - Beira Alta - Portugal)

Lo que voi contavos agora nun ye un chigre en concretu, ye una esperiencia en xeneral, un puntu de partida por si vos coincide dir a Viseu durante les fiestes de San Mateo. Convien esplicar que San Mateo en Viseu podria ser la pesadilla de cualisquier conceyal de festexos del mundiu mundial. Pa que vos faigais una idega ye como si tolos chiringos d'Uvieu y los caballitos que n'Uvieu nun hai, los punxeran toos xuntos n'un sitiu abiertu y, amas, tuvieran un pabellon piquiñin onde facer una mini-feria de muestres de Xixon y tou esto ¿durante cuantu tiempu?. Los mas conservadores dirieis qu'una selmana, 10 dies como munchu; los mas optimites pues qu'un mes, pero a naide se-y ocurrio, de xuru, dicir que del 10 d'agostu al 23 de setiembre, ¿a qu'eso, a que non?. Estes son feries y lo demas tonteries. Con esta duracion, si vais a Viseu en branu ye casi normal alcontrase cola Feria. Esta coloquenla n'una esplanada del centru la ciuda a la que dende la parte hestorica podeis llegar en funicular (esto de los portuguesos de poner les ciudades con tantes altures, nun termino de velo) magar que'l mesmu de nuechi pa xubir ya nun furrula, alvertios quedais. Menos el dia de la nauguracion nel que s'entra de baldre, el restu los dies hai que pagar (nun m'alcuerdo cuanto). La feria ta abierta dende la mañana a la nuechi. Dientro de la feria, el pabellon con les empreses (piquiñin) y munchos cachibaches pa montar los guah.es y los non tan guah.es :-) y, por supuestu, la zona los chiringos. Hailos de toes claes y algo pertipicu en dellos ye'l gochin asau. De tola zona de chiringos yo quedome coles barraques tradicionales que ponen peñes y pequeños comerciantes onde pue vese un Portugal d'esi que se paez a la España de los 70 y qu'a mi, prestame asgaya. sitios perpequeños con 4 meses dientru y cuatro mas fuera.

La nuestra barraca taba atendida por dos paisanos mayores con una cocinera. Xintemos fuera y pidimos lo que la paisana nos encamento, anque foi'l paisanu el que dempues tuvo con nosotros pa servinos (yera un ex-emigrante en Francia y como la muyer fala frances, taba encantau de prauticar). A la xinta, lo tipico de la feria de San Mateo a lo que baexen tolos paisanos de los pueblos, la "espetada de enguias", o seya, el pinchu de anguiles, que venien cola compaña d'una ensaladina de llechuga, tomate y pepinu, cenciella pero perbona porque too venia de la güerta del paisanu y notabase la de Dios (el pepinu taba pa rellambese). Les anguiles vienen en escabeche y salen d'una conservera (o varies) que les venden por barriles abondo piquiñinos. Les de la semeya son grandes, normalmente son mas pequeñes y xintense ensin quitar la espina. A estes hubo que mete-yos un poco mas de manu. Un esperimentu que nun ta mal, la verda, anque meyores coses prebe na vida, esto presta asgaya n'esti entornu.

Ye qu'equi, son de interior, lo d'ellos ye la carnona. L'otru platu una xuletina de gochu tienra frita con unes pataquines fritines y un güevu de casa que taba pa rellambese (¡ay, que faciles somos cuando tamos agustu!). Estes coses o unos güevos de verda con pataques y chorizu hai vegaes que nun se paguen con dineru, ¡ho!

Si'n delles semeyes veis unos sobres de quechup o mayonesa ye porque la neña tamien queria una salchicha que fuimos mercala al macro-chiringu d'enfrente y que nun nos punxeron dengun problema por xintala nel nuestru chigrin. De compaña una xarra de vinho branco de la zona (que ye Dao) y toi seguru de que nun llego a los 25€....too. En fin, si tais per Viseu en branu, pasai pela feria :-)