viernes, 19 de diciembre de 2014

El Llagar de Colloto - El Llagar de Cuayoto (Cuayoto - Uviéu)


El Llagar de Cuayoto ye un de los chigres clásicos de la zona d'Uviéu. Anque grande ye abondo afayaízu cola piedra y la maera cola que ta puestu y eso que tien una disposición un tantu rara de la barra que ties que cruciar pela metá pa pasar del bar al comedor. Fuera tien cuatro columpios y espaciu pa xugar los neños (dicir, que lo más interesante pa ellos, ye la fonte de decoración más que los columpios, llevai un pantalón de más si ye iviernu, jaja).

Y llega lo nueso, que ye'l comer. Como yera d'esos díes nos que yo taba esfamíau entamemos con unos calamares frescos con tocín fritu, d'eso que vien bien pal colesterol del malu. Una ración abundante que vien servida dientro d'un bollu pan, a mi nun m'enturguéis porqué, que nun lo sé, esto vien asina y puntu.

Bona ración, con un productu rico, con un amestu dificil d'entender (el del tocín), pero resultón.


 


De segundu (escaecióseme saca-y una semeya, ya vos dixe que tenía fame), un xuletón de vaca vieya poco fechu pa dos. Bonu, prestosón pa los carniceros. Una bona ración que venía presentada sobre un platu caldiu (que nun una piedra que fain munchu fumu) por si al "poco fechu" quies da-y un toque más, nun fuera se quedaren cortos. Si lu pides perfechu va ser que queda ensin arreglu.


Un par de cafetinos con xelu, un par de botelles de Quelo (normalmente nun ye una sidre que me preste munchu, pero esti palu taba bonu) y'l resultáu nun foi baratu, pero tampoco caru pa lo xintao, eso sí ficiéronse cargu los benditos tiques salva fartones como yo, 35€cabeza.

Un sitiu prestosu pa seguir xintando ellí dempués de tomar unes botellines de sidre colos collacios na barra.


2 comentarios:

David Castañón dijo...

Quelo ta bien ho, un pocu dulzona, pero pue bebese.

Lo de los calamares con tocín nun acaba d'atopalo ... qué raro ye ...

Fartones dijo...

Tan bonos, un poco raro, pero como son calamares frescos a la romana y'l tocín va a parte...nun aporta gran cosa, que ta perllí y puntu :-)