lunes, 23 de febrero de 2015

Asador la Quinta (Ribadeo - Lugo - Galiza)


Ya de vuelta pa casa paremos en Ribadeo a xintar, en un de los pocos llocales con tiques que según la app hai equí. La verdá que y-teníemos ganes porque intentemoslo unos meses pa tras y nun había sitiu (y mira que'l chigre ye grande), asina que mal nun se podía xintar teniendo'n cuenta tamién la variedá de la ufierta chigrera qu'hai n'esti pueblu.

El chigre tien dos ambientes, el de vermú y vino na barra que ta namás entres y'l de ponese a comer que ye un comedor tipo loft bien grande con ventanales al fondo y'l techu tresllúcidu presidíu por una parrilla. A pesar de lo grande ye abondo afayaízu, quiciabes porque nos tocó una esquinina y nun me punxeron na metá del comedor (que pa mí tener meses tou alrodio fastidiame'l fen-shui esi),quiciabes tamién ayuden les setes estes con califación que tienen pa los díes d'iviernu como estos. El casu, ye, qu'al menos esi día, alcontremonos agustu.

Tolo que pidimos foi para compartir, entamemos fuerte, con unes amasueles a la mriñana que fueron lo meyor de la xintá. Grandes, fresquines y de bon tastu, nel su puntu les amasules taben tan bones que sobresalíen magar de la salsa na que nadaben, que yera mui espesa y nun mos dio munchu por ella. Compensó'l productu equí, por ciertu que foi una ración curiosina.


El siguiente platu foi más floxu, pa compensar, que taba bien de tastu, pero nun de puntu. Si nun lo sabéis ya vos digo yo qu'a mi'l pulpu prestame hasta crudu, si hai que lu comer, cómese. Nesti casu, pulpín a la brasa con pataques a la panadera frites (les mesmes qu'eché de menos nel Tira do Cordel para la llubina). Como vos digo, el pulpu falló na testura y taba duru (igual valía para les 50 solombres de Grey eses), na malo que dicir al tastu.


Tando'n viaxe tampoco yera cuestión de fartase, pero viendo la parrillina terminemos pidiendo 1/2 de costielles de gochu que veníen con pataques tamién y que taben xugosines y perbien feches.



1 de agua grande (DXT dixit), dellos albariños de la casa por copes (yo tomé una y normalín) y un par de cafés con xelu, 26€ por cabeza en cargu a los billetes del monopoly.

Resultáu dientro de lo que nos suponíemos, bien.

lunes, 16 de febrero de 2015

Tira do Cordel (Escaselas - Coruña - Galiza)


El Tira do Cordel ye un afamáu chigre de la zona de Fisterra situáu nuna esquina de la Playa de Langosteira. El nome debe-y venir porque pa entrar en vez de tirar de la maniya ties que tirar d'un cordel que la sustituye.


Puestu en maera y piedra tien bien diferenciades les partes de chigre y restaurante y esti tamién se dixebra ente salón y terrza cubierta, magar que dende'l restaurante ties unes bones vistes de la mar y la playa (perprestoses) y que ye más afayaizo que la terrza, dende esta ties que tener meyores vistes, pero taba zarrada esi fin de semana.

Entamo cola comanda, pidimos una de longueirones (unos muergos de la zona de Fisterra) y la famosa pela zona llubina a la brasa. Pero, el dueñu comentonos que con 35 minutos de espera pola llubina, meyor nos traís unos percebes, tamién pa tenenos más tiempu entreteníos, que bono que si quitaba cantidá d'equí (longueirones) y metía menos percebes d'ellí, que tabemos a pre. La verdá que díxolo too él, ensin oportunidá de retruque y salió-y bien porque la cuenta xubió 10€ más (que nun van a dengún sitiu) pero que metíos asina ye como cuando vas mercar el coche y metente un coche con 2 o 3 estres más sin tenelo pensao porque ye'l coche que tienen ellí y si lu quies vien y si non 3 meses pa que te llegue el que tu quies por menos perres.


A lo nuestro, ración de percebes nun cuantificable (nun sé como ye una ración normal). Tal y como nos dixo, nun demasiao grandes, pero ricos, persabrosos.


Ración nun cuantificable de longeuirones (2 € menos de lo que valía una) a la plancha. Ricos de tastu, pero que yo nun sé diferenciar de los muergos d'equí, la preparación tenía problemas, sobraba-yos aceite y faltaba-yos sal, polo menos nun veníen con sable. Prestosos ensin más, cola curiosidá de prebar una bichu de la zona.



Lleguemos al platu estrella del chigre, la llubina a la brasa (2 raciones). Na que dicir nin de la pieza, nin del prodcutu, xabaz y plenu de tastu. Desespinada y cortada en 6 cachinos, con un puntu perfeutu de la carne,la preparación a al brasa dexa'l pelleyu turriadín, pa comelu ensin más cola llubina y quema les raspes del pexe que integra na salsa del mesmu. Con esti productu, el resultáu nun pue ser malu, nin de ¡lloñe! taba prestosu, anque yo siga prefieriendo una preparación al llombu y sobre too, ¡onde se vio!,¿pataques cocies aparte?, non home non!!pataques a la panadera, metidines col pexe al fornu!. Fuera coñes, taba rico.



Rico y bien cobrao, 45€ por cabeza con un Vionta 2013 de compaña, un café con xelu y una grande d'agua, va en gustos.




lunes, 9 de febrero de 2015

Carboeiro (Rúa de Francos - Coruña - Galiza)

Nun había meyor fin de selmana pa marchar a Galicia que'l de la nevadona, ¡vaya puntería!.
El chigre Carboerio ye'l chigre del aloxamientu de Turismu Rural nel que nos quedemos esi finde. El llegar tarde abondo pa acercanos a otru sitiu fixonos decidir quedar ellí y tamién porque tenía bona pinta.
Sitiu afayaizu, bien puestu en maera y piedra y más prestosu na parte de riba porque na de baxo ponen la TV.
Nun esperábemos nada, asina que prestó el doble alcontrar una sitiu asina con bona comida y eso que de detalle de la casa traxeronnos una empanada gallega casera, pero normalina, nin fú, nin fa (que nun too lo casero tine porque tar bono) eso sí, cola fame que teníemos, acabó entera nos nuestros butiellos, h.e, h.e.


La cosa cambió completamente col priemeru pa comaprtir, unes zamburiñes de bon tamañu a la plancha con aceite, perrexil y sal, ensin más. La verdá que prestoses y sabroses. Un bon entamu, esti sí.


De segundos yo tireme pol sollombu de vaca poco fechu. Perfeutu de puntu, poco fechu,como yos lu pidí, y cola cantidá xusto de sal. Venía con unes pataquines a la panadera que pa mí teníen un toque de fornu. Lo del "árbol" esi verde, nun se que pintaba, pero ya vos digo que tenía fame y desapareició tamién del platu.


Pel otru llau de la mesa unos papos de xatu, mui ricos, cola compaña de les mesmes pataques a la panadera que'l sollombu. Otra bona ración nel so puntu de preparación.
Platos cenciellos, resultones y abundantes, una cena perfeuta pa les nueses exixencies d'esa nuechi.
Un café con xelu y una cuenta que nun sé si dividila ente dos o tres, porque con nosotros pasola un tal Marcelo que foi buenín y portose estupendamente, nun dio na de guerra. El total fueron 69 € que nun me paecieron mal, teniendo'n cuenta que teníemos dos vinos na barra primero.